හිටපු ජනපතිවරුන් ගත්තු සිඟිති ආතල් එළියට 

විශ්‍රාමික ජනාධිපතිවරුන් හිටපු නිල නිවාස මහා ජන ප්‍රදර්ශනයට 

විශ්‍රාමික ජනාධිපතිවරුන් හිටපු නිල නිවාස ඉදිරියේ දී මහා ජන ප්‍රදර්ශනයට ලක් කරන බව ජාතික ජන බලවේගයේ විධායක සභික කේ.ඩී. ලාල්කාන්ත මහතා පවසයි.

එසේ කරන්නේ පාලකයන්ගේ වරදින් ජනතාව දුක් විඳිද්දී, මේ රටේ නායකයන් කෙතරම් සුඛෝපභෝගී ජීවිත ගත කර තිබෙන්නේද යන්න ජනතාව දැන ගත යුතු නිසා බව ද කේ ඩී ලාල් කාන්ත මහතා පෙන්වා දෙයි. 

ඉදිරියේදී මෙම නිල නිවාස ප්‍රදර්ශනය කරාවි යැයි බියෙන් ඇතැම් හිටපු නායකයින් සිය නිල නිවාසවල බඩු භාණ්ඩ වෙනත් ස්ථානවලට ගෙන යන්නට උත්සාහ කරන බවට තොරතුරු වාර්තා වන බවද ලාල් කාන්ත මහතා කියා සිටියි. 

"මේ රටේ දේශපාලනඥයන් ජනතාවගේ සම්පත් කුමන ආකාරයටද පරිහරණය කළේ කියන කාරණය නොදැන සිටි අය ඒවා දැන ගත යුතුයි. ඒ වෙනුවෙන් අප මෙම අති සුඛෝපභෝගී නිල නිවාස මහා ජන ප්‍රදර්ශනයට ලක් කරනවා. ජනතා මුදල් කාබාසිනියා කරමින් සිඟිති ආතල් ගත්තු උදවියට මේ ක්‍රියාදාමය ගැටලුවක් විය හැකියි.

ජනතාව දූෂණයට සහ වංචාවට විරුද්ධයි වගේම එසේ දූෂණ සහ වංචා කළ අයට දඬුවම් දිය යුතුයි කියන ස්ථාවරයේ සිටිනවා. ජනතාවගේ සල්ලිවලින් සිඟිති ආතල් ගත්ත අයට මේ ක්‍රියා මාර්ග ඇහේ කටු අනිනවා වගේ විය හැකියි." යනුවෙන් ද ලාල් කාන්ත මහතා පෙන්වා දෙයි.